حصريا قصيدة حكاية كبيرة

أقولك حكاية…
يمِكن مَتصدقهاش…
النور قاطع ف شارعنا…
من سنين ولسّه مجاش…
عارف ليه…
آه والعيش والملح…
زى ما بقولك كده…
ودوَّرنا كتير مخلَّيناش…
وملقيناش…
غير سلك عريان مكشوف…
واقف ف العتمة مكسوف…
ساكت آه…
لكنَّه مبينساش…
لمَّا الماسورة اتخرمت…
وربطناها بحتة قماش…
ولكل جرح بينزف…
شوية بن…
ولو البن غالى بلاش…
إيه ياعم…
إحنا كل ده ف ميدان التحرير…
لسَّه متحركناش….
آه والعيش والملح…

حَظّك اليُومْ…
زَىّ إمْبارحْ…
زَىّ كُل يُومْ…
ومَفيشْ حَاجةَ متْغيّرةْ…
الْبت الطّويلَة عَايزَاكْ…
بَسَ إنت عَيَنكْ ع الْقُصيرةْ…
يَا لَئيمْ…
بَسّ إبن حَلاَل وطيّب…
وتِستاهل كُل خير…
وحِتّة سُكّرة…
شُوف…
الزَّهْرة مع الْمرّيخْ وعَطَاردْ…
وشْويّة كَوَاكب كَدهْ…
عامَلين معاك شُغل…
آخرْ مسْخَرَةْ…
تطْلَعْ منْ إنتخَاباتْ…
عَلَى استفْتَاءاتْ…
وَحَاجَاتْ ومحْتاجَات…
وبيعْ وسَمسَرةَْ…
وإنتَ ماَشَاء الله عليِك…
غَزَالْ يا رَبّى…
لاَ هَمّك إشاراتْ…
ولاَ مْطّباتْ…

ولا شَوَارعْ مِكسّرة…
شُوفْ…
التّعْليمْ…
زَىّ الْقَديم…
والصحّة رَبّنا يُسْتُر…
مَتتْخَضّش كدَه يَاعَمّ…
إيه يَعْنى الْلى جَرَا…
عَنَدكْ وحَاجَاتْ…
وَحَاجَاتْ تَعْديِلْ…
وَحَاجَاتْ…
تتْغَيّر ف التّوْكْيل…
وَحَاجَاتْ مَعَدْتَش تِنْفَعْ خَالصْ…
وحَاجَاتْ عَايزَةْ…
بوَية وسَمكّرةْ…
شُوفْ…
مَعْمولّك عَمَلْ مَرْبُوطْ…
فِى ديل قرْد شَقِى وَمحْطُوطْ…
فَ حَاجة مدَوَّرْةْ…
وبَعْد نُقْطُتينْ…
راَيحْ حتّةْ…
اللهُ أْعَلَمْ فِينْ…
لا ليها عُنوَان منْ قُدّام…
ولا مِنْ وَرَا…

» حصريا قصيدة (اعز الاصدقاء)
» حصريا عندنا وبس قصيدة حب جرئ برئ
» حصريا قصيدة شمس الحب والحنان
» حصريا قصيدة يــا رســول الله عـــذرا
» قصيدة دنية